السلام عليكم ورحمة الله وبركاته
كيف الحال شباب ؟؟
هادي النتايج الجولة الأولى من تحدي جدة مونسترز >>>>
----------------------------------------------
@triple و انساهم يا قلبي
هادا تعديل ونتيجة Triple
التعديل جيد ..
بس اول ما يلفت انتباهي البنت الي على اليسار لبسها مرة فاحش ومسيء ..اتمنى ماتعملها مرة تانية
عجبني اللون .. الاخضر ..
عجبني طريقة تركيبك للبنات بحجمهم المناسب مع حجم المناسب وخصوصا انعكاس البنت اليمني على الكبوت مرة متقن
فتحات التهوية الجديدة لا بأس بها ..
الجنوط جيدة .. بس حاول تركز في لون الجنوط ولون التاير حتلاقي اختلاف كبير .. لانو اساسا التايرات لونها فاتح بسبب الخلفية
فاتمنى منك .. تغمق التايرات المرة الجاية ..او تعمل عل حسب الخلفية ..
القطع الي فوق السقف ..حلوة وحجمها مناسب بس بعيدة عن ستايل السيارة بالمرة ..
كنت اتمنى لو انك ماعملت النيون لانو اساسا الجو نهار ..وصعب الواحد يزبطه ادا ما كانت الخلفية غامقة ..
كذلك كنت اتمنى انو ماتستخدم اداة التنعيم Blur tool او اداة الاصبع smudge tool على الصدام بكثرة ..
ولكن مع ذلك عجبني انك حاولت تزبط الألوان
بالتوفيق
الفائز :: Triple
--------------------------------------------------
AL-NITRO و Brave15
هادا تعديل و نتيجة AL-Nitro
والله يا حاتم مستواك يون عن يوم بيزيد
عجبني في تعديلك .. الألوان .. وحركة الكبوت .. والقطع والزوايد الحلوة ..و الخلفية
الجنوط حلوة.. ولكن المشكلة من زمان لحد الان ززمشكلتك انك تغمقها زيادة عن اللزوم ..
المقاعد زي محنا شايفين مرة صغيرة ..يعني لو انك كبرتها واعدت رمسها كانت بتكون افضل ..
الفتحات الناقصة من الصدام الأمامي المفروض كنت ترسمها على قد ماتقدر .. او اعطيك فكرة افضل ياليت لو غطيتها باي شي ..
يعني مثلا لوحة او اي قطعة كبيرة مناسبة ..
وهادي النصيحة تمشي مع اي شي غلط ماتقدر تعدله .. يعني لو عندك شي غلط في الزجاج تقدر تحط انعكاس سحاب ابيض مثلا ..
فكر كيف ممكن تبدع عشاتن تتخلص من اي شي
بالتوفيق ..
الفائز: AL-NITRO
------------------------------------------
King of mazda VS HDDA
تعديل king
تعديل HDDA
-----------
نتجية King
والله يا أسامة هادا من أفضل تعديلاتك لحد الأن ..
كل شي عجبني في التعديل ..
بس حاول تعطي الخلفية نفس الإبداع الي تعطيه للسيارة .. شايف الخلفية كيف سوداء وغامقة من اليسار ؟!!! ( تحت لوحة معرض السيارات والزجاج بتاعه )
الجنوط مرة حلوة ..بس زي ماقلت الجنط الامامي اظن انه تم تصغيره عشان يكون ملتف ... بس مع ذلك لا يزال غريب بالنسبة ليا ..
ثانيا الجنوط لما بدك تخليها غميقة Deep dish لاتنسخ الجنط من جواه مرات عديدة .. لانو راح يطلع خطوط حق النسخ ..
عشان كده لازم تحاول تعيد صبغ الخطوط ده دي من جديد وتحاول تخفي بعض منها مش كلها ..
الإكسوست والدخان الي طالع مرة ابداع ..
الإنعكاسات وطريقة التفافها على البودي مرة متقنة ..
في شي مهم وياليت تنتبه ليه ..انتا و انساهم ياقلبي ..
اش هادي الخطوط البيضاء المنحنية ؟!!! انا عارف انها تعطي جمالية بس انا عمري ما شفت سيارة حقيقة فيها هالخطوط !!!!
يعني في جنب السيارة موجود انعكاس للأرضية صح .. طيب كيف تحط فوقه انعكاس خطوط بيضاء ..؟؟!! لانو مستحيل يتحط انعكاس فوق آخر ..
دي قوانين الطبيعة ومش ممكن نغيرها....
غير كدا الخطوط الي حطتهم في الزجاج بتاع المعرض !!!
لذلك اعتبرتها خطا قاتل !!!
الطريقة الوحيدة الي تخليك تقدر تحطهم ::
ادا كانت السيارة TOON يعني انعكاساتها مش واقعية تقدر تحط زي مابدك من دي الانغكاسات ..
كذلك عجبني طريقة في تركيب البودي كت..
بالتوفيق ..
-----------------
نتيجة hdda
يووو يا HDDA اشتقنا لتعديلاتك .. من زمان عنك ..
نجي للتعديل
طبعا انتا دائما تنوع افكارك وهادا الي يعجبني فيك ...
كل شي عجبني تقريبا في التعديل ..
عجبتني حركة الكبوت والمحرك الي فيه ... عجبني كيف الزجاج المرفوع مزبط شكله من تحت على شكل النزلة والطلعة الي فوق الشمعات الامامية
الزينون حلو ...و الخلفية حلوة .. الجنوط كذلك ...
الأشياء الي ماعجبتني .. او الأخطاء ..
اول شي النيون ... البعض بيقول بالعكس مرة حلو .. لكن لو نجي نحسب مكانه بالزبط راح يكون مكانه مرة غلط .. وموطبيعي ... النيون الي عملته كانه اللمبة حقته خارج السيارة مو تحتها .!!!
ثانيا النيون لازم تكون مساحته واسعة تحت السيارة .. لكن النيون حقك مجرد خط .. والي على اليسار ظلام دامس .. !! يعني المفروض ادا بتسوي نيون لازم ماتسوي ظل جمبه ..
لانه طبيعي المكان الي فيه ضوء.. مستحيل يكون فيه ظل ...
عندك برضو الانعكاسات الي على الجمب كانها توقيع وخربة شكل السيارة ول ماحطيتها كان احسن !!!
كمان الانعكاسات مجملا في اماكن خاطئة يعني عندك في الصدام فيه مناطق مواجهة للسماء المفروض ماتركب عليها انعكاس بيوت .. لانها كدا صايرة كانها كتابة فوق صورة او توقيع !!
كذلك عندك الزجاج الامامي عليه انعكاس مرة حلو .. بس انتا يمكن سويت فلتر blur او نسيت تمسح المنطقة البيضاء على اليسار .. ( الي حول الستيكر اكستريم ) لانه مستحيل تركب انعكاس
بيت غامق وفوقه انعكاس فاتح ... ( الي على اليسار )
عندك كمان شي مرة ما حبيته .. الي هوما خطوط التحديد بالأسود عل جنب السيارة كامل .!!!
.. هادا كل ماعندي
وبالتوفيق ..
الفائز: King of mazda
-----------------------------------
King of mazda VS ZIDANE
هادا تعديل ونتيجة king
التعديل ده أقل من المستوى بشكل كبير ... بغض النظر عن انو عندك 3 مقاعد ومفيش وقت بس كان المفروض تخليه احلى من كده ..
مفيش حاجة عجبتني غير الخلفية الرهيبة والشرارات والأضواء الامامية بتاع الــ s14
اول شي نلاحظه هوا الصدام الأمامي المغبش والي مش عارف كيف خرج عن سيطرتك ..
كذلك نشوف الجناح الخلفي بعيد عن مكانه الصحيح .. ما اقدر اتخيل انو ماكان عندك وقت عشان تحركه شوية على اليسار !!!
غير كدا اعطيك تحذير في المرة القادمة ماتنسخ البودي كت الجانبي كله بتاع الــ s14 وتركبه .. انتا لازم تنسخ قطعة من الخلف او من الأمام بس مش تنسخ الجنب كله ..كده يعتبر كانك ما عدلت
على الجنب ..!!!
بس المر دي مشيتها ولا كنت راح ارفض التعديل...
غير كده اساسا ناقصك تحت انعكاسات الأرضية الزرقاء على الجنب .. لانو السيارة باين انها عملتها لون رمادي ( بضغطة زر )
عجبتني حركة الجنوط المتحركة بس مش مرة متقنة ..
بالتوفيق
الفائز: King of mazda
--------------------------------------
عسلية King of mazda vs
هادا تعديل ونتيجة king
هنا اول مايلفت انتباهنا هوا الستيكرات .. لانها مرة حلوة
عجبني الرفارف الجانبية .. والجنوط والخلفية ..
ماتزعل مني بس الإضافات بتاع الصدام الامامي دي مو اضافات دي اي كلام !!! يعني الفتحات لونها مش متناسق مع الصدام .. والجناح جيد بس دقته ضعيفة .. والانتر كووولر دقته تعبانة جدا
!!!
الظل غريب ومش طبيعي ... كنت المفروض تحركه ناحية اليسار ..
الجنوط عجبتني ... بس حاول تركز في عمل التايرات وخصوصا المنطقة الداخلية لها لازم تكون غامقة او لونها متناسق ..
بالتوفيق..
الفائز: King of mazda
--------------------------------------------
ملاحظة هامة : طبعا في مشاركين ماظهرت تعديلاتهم.. بسبب انو ما نزلوا اي تعديل اساساً
والبعض لم يرسل تعديله للعضوية المذكورة في موضوع التحدي .. والي هيا عضوية mask cool
يعني القانون كان واضح انو التعديل يترسل للعضوية ..
وعشان ما احد يزعل مني .. انا مجرد حكم بس .. اما سياسة القوانين تقدروا تراجعوا gm-over
----------------------------------
في النهاية صراحةكان ليا الشرف انو اكون الحكم في الجولة دي ...
طبعا حبيت اعمل النتايج في تصميم بسيط وواضح عشان الكل يعرف اش ايجابياته وسلبياته ..
إن شاء الله اني اكون اتوفقت في التحكيم ..
وان كان هنالك من خطأ فهو من نفسي والشيطان .. وان كان صواب مني فهو من الله وحده
مواقع النشر (المفضلة)