بسم الله الرحمن الرحيم
السلام عليكم و رحمة الله و بركاته
لكل شيء من قِبل المرور إجراءاته الخاصة، على سبيل المثال: طلب اللوح الطويلة، تغيير لون السيارة، إخراج السيارة من الحجز، ورقة إصلاح مركبة، إجراءات الرخص المنتهية ......... إلخ
حبيت يكون هذا الموضوع مخصص لمساعدة التائهين في ساحة المرور أو من حُجزت سيارته لأول مرة أو اللي حاب يقدم على لوح طويلة .
حبيت أشارك بإجراءات (( تقديم طلب اللوح الطويلة )) و يا ليت اللي عنده إجراءات يشاركنا بها عشان نكون عارفين وين نروح و إيش نسوي ..
أبدأ بإجراءات اللوح الطويلة:
1- إركب سيارتك و شغلها و توكل على الله إلى [ مرور جدة ] شارع الصحافة جنب نادي الاتحاد << لسكان جدة .
2- خذ معاك و أنت نازل استمارة السيارة مع بطاقة هويتك .
3- اذا دخلت ساحة المرور، روح إلى الغرفة الصغيرة اللي جنب بوفية مرور جدة .
4- اذا دخلت الغرفة، اطلب من الهندي يصور لك الاستمارة .
5- إتجه إلى مبنى " شعبة الرخص " و معاك صورة الاستمارة و بطاقة أحوالك .
6- أول ما تدخل المبنى تلاقي في وجهك الاستقبال و على يدك اليمين إستقبال اللوح الطويلة، إتجه إلى العريف اللي جالس و قل له: لو سمحت حبيت أقدم على لوحه طويلة .
7- حيطلبك صورة الاستمارة + بطاقة أحوالك + 100 ريال، حيكتب لك فيها إيصال .
8- بعدها حيقول لك: إطلع فوق الدور الأول و آخر السيب على يدك اليمين .
9- لمن توصل الدور الأول، إتجه آخر السيب و تحصل غرفة صغيرة مكتوب عليها { أرشيف 4 } .
10- أدخل و أعطيه الإيصال و صورة الاستمارة .
11- إرجع لهم بعد 15 يوم و نقول لك (( ألف مبروك على اللوح الطويلة )) .
إن شاء الله أكون أفدت بعضكم و إن شاء الله نشوف تفاعل من الأعضاء ببقية الإجراءات اللازمة في المرور ..
مواقع النشر (المفضلة)